Niakatra teto Antananarivo niaraka tamin’ny namako maromaro aho mba hitsidika tranom-boky iray ao analakely ao ny herinandro lasa teo. Maro ireo olona mifamezivezy ao na mpianatra na efa mpiasa samy mitady izay mahasoa azy avokoa. Ny tena nahavariana ahy sy ireo namako dia ny nahita, na naheno ny marimarina kokoa ireto ankizy mpianatra hafa teo nifampiresaka. Mailaka sy malama ery ny fitenin’izy ireo teny frantsay. Na ny mpanontany na ny mpamaly moa va tsy ireny zana-bazaha ireny mihitsy? Tsy hoe akory tsy mahay teny vahiny ny mpianatra toa anay saingy azo lazaina ho tara mihitsy raha oharina amin’ireo eto an-drenivohitra. Asa na mitombina ny fitenenan’ny olona maro hoe ny mpianatra amin’ny sekolim-panjakana matetika manana olana amin’ny fomba fanoratra na fiteny ny teny vahiny. Anisan’ny fepetra takiana any anatin’ireny sehatr’asa maro isan-karazany ireny foana anefa ny fahaizana teny vahiny indrindra ny teny frantsay. Eto no mbola mampametra-panontaniana hoe na mitovy aza ny programam-pampianarana eto an-drenivohitra sy ny any ambanivohitra dia hita fa somary tara foana ireo ankizy avy lavitra. Mila hampitomboana ve ireo boky sy raki-tsoratra fankan-kevitra ho an’ireo mpianatra? Tsapa ankehitriny fa maniry hoatry ny anana ireny antsoina hoe cybercafe ireny  na any amin’ny faritra mihataka ny renivohitra aza. Indrisy anefa fa na natao ho fanovozam-pahalalàna aza izy ireny dia mbola tsy ampy hanatsarana ny fomba fanoratra sy fiteny ny teny vahiny ihany