logo
Lakroan'i Madagasikara
Haino aman-jery sy gazety

‘Colisée’ ao Anatirova, OMS sy ny CVO, fitombon’ny tranga tratry ny ‘covid-19’

Rasoanjanahary il y a 1 année

Satria manano-sarotra ny fanaparitahana ny gazety Lakroa (Lakroan’i Madagasikara) dia eto amin’ny tranonkala no hamoahana ireo lahatsoratra tokony ho novakianao tao amin’ny laharana mivoaka ny alahady 31 mey izao, laharana 4182, alahadin'ny Pantekoty.

‘Colisée’ ao Anatirova, OMS sy ny CVO, fitombon’ny tranga tratry ny ‘covid-19’

Haino aman-jery

‘Colisée’ ao Anatirova, OMS sy ny CVO, fitombon’ny tranga tratry ny ‘covid-19’

Mamarana ny 15 andro fahadimy amin’ny hamehana ara-pahasalamana isika amin’izao herinandro hatramin’ny Pantekoty izao. Anisan’ny zavatra nanamarika ny herinandro lasa iny ny ‘colisée’ notahafina tamin’ny any Roma naorin’ny fitondram-panjakana haingana dia haingana eny Anatirova Antananarivo izay nahagaga ny olona maro, nipoiran’ny hevitra mifanipaka tamin’ny haino aman-jery samihafa sy tambajotra sosialy, tsy nampitovy hevitra teo amin’ireo sokajin’olona maro mpahay tantara sy mpandala ny vakoka. Anisan’ny naneho hevitra momba izany tamin’ny fahitalavitra tsy miankina ny Jeneraly Ramakavelo Désiré, mpahay tantara sy akademisianina, nilaza fa samy hafa ny ‘restauration’ famerenana amin’ny laoniny ny vakoka sy ny ‘renovation’ izay fananganana zava-baovao. Anisan’ny mitsipaka ny fikitihana ny ao anatin’ny rova ihany koa ary handalana ny hasina sy hitandremana ny fady amin’ny rova ny Profesora Ralison Roger, araka ny resany tamina radio tsy miankina, izy izay efa tompon’andraikitra momba io rova io tany amin’ny taona 1974. Misy ihany koa ny fanangonan-tsonia any amin’ny tambajotra sosialy hanoherana io fandravana ny soatoavin’ny vakoka malagasy io, ka maherin’ny 10 000 no efa voangona raha 15 000 no tanjona tamin’ny 25 mey 2020. Tsiahivin’ny mpisera ny fampitandreman’ny Unesco ny tsy fifanarahan’ny asa atao amin’ny fanarenana tokony hatao mba hitazonana ny maha vakoka azy, araka ny taratasy nalefan’ny talen’ny ‘Centre du Patrimoine Mondial’ eo anivon’ny Unesco, Dr Mechtild Rössler tamin’ny masoivohontsika eo anivon’ny Unesco any Paris Ramatoa Yvette Sylla tamin’ny 24 fevrie 2020. Novoizina mafy tamin’ny haino aman-jerim-panjakana TVM sy RNM moa fa zavatra nifanarahana tamin’ny komity siantifika ny fanatanterahana azy io, na dia hafa noho izany aza ny vaovao miely any anivon’ny tambajotra sosialy sy ny gazety any ivelany toy ny ‘Le monde’ nanamarika ny fisian’ny tsy fitovian-kevitra amin’ny fanorenana azy araka ny resany tamin’ny Profesora Rafolo Andrianaivoarivony mpikambana amin’ny komity siantifika, ary nilaza ho nametra-pialana mihitsy ; nampanantsoin’ny filoham-pirenena ity mpahay tantara sy mahalala momba ny vakoka ity tamin’ny 25 mey, ary voalaza fa tsy nekena ny fametram-pialany ary mijanona ho mpikambana ao amin’ny komity siantifika izy, araka ny fampitam-baovao avy any amin’ny prezidansa. Tombanan’ny mpanara-baovao sasany ho toa tahaka ilay resaka CVO sy ny hevitry ny ANAMEM (Académie nationale de médecine de Madagascar) indray ity raharaha ity, manohitra dia avy eo manaiky.

 

Momba ny OMS sy ny CVO nahabe resaka sy tsy mampitovy hevitra ny olona rehetra ny fisotroana na fampisotroana azy (an-tery ho an’ny mpianatra tany am-boalohany), dia nambara koa tamin’iny herinandro iny ny fisian’ny fifampiresahana teo amin’ny filoha Rajoelina sy ny tale jeneralin’ny OMS Tedros Adhanom Ghebreyesus tamin’ny alalan’ny ‘visioconférence’ ka hanampian’ny OMS an’i Madagasikara amin’ny fanaraha-maso ny ‘essai clinique’ momba ny CVO. Raha ny marina, tsy niova amin’ny andraikiny eo amin’ny fampanarahana ara-tsiansa ny fanafody ampiasaina vokatry ny fikarohana atao ny OMS, ary tsy i Madagasikara irery no hanaovany izany fa maneran-tany, hita ao amin’ny tranonkalan’ny OMS ny toromarika sy dingana samihafa atao momba izany. Na eo aza izany sy ny ahiahin’ny olona sasany momba ity CVO ity, dia manohy ny dokam-barotra momba azy ny fitondram-panjakana amin’ny TVM sy ny RNM mba hampitomboana ny hery fiarovana ao amin’ny tena, efa vita an-kira izany ary efa amidy amin’ny tsena tokoa ilay CVO ranony sy fangaro ho tanehana. Momba ny fikaroham-panafana amin’ity aretina covid-19 ity ihany dia nohazavain’ny Profesora Luc Rakotovao tamin’ny fandaharana isan’andro momba ny ‘covid-19’ tao amin’ny TVM sy ny haino aman-jery samihafa tamin’ny 27 mey fa samy hafa amin’ny CVO ilay tsindrona fangarona fanafody roa hanaovana ‘essai clinique’, fanafody niarahana tamin’ny siantifika avy any Maurice sy Thailande ary Etazonia. Tany Toamasina no efa nambaran’ny filoha Rajoelina ny momba izany tamin’ny 26 mey fony izy nanao fitsidihana tany an-toerana nanolotra fitaovana hiatrehana ny aretina ‘covid-19’.

 

Eo amin’ny ara-panahy, dia mitohy ny fotoam-bavaka tamin’ny haino aman-jery noho ny tsy mbola fisokafan’ny Fiangonana rehetra tamin’ny alahady 24 mey teo. Ho an’ny EKAR dia niainga hatrany tao amin’ny katedraly Andohalo ny lamesa nampitaina tamin’ny radio sy televiziona IBC, notarihin’i Mgr Pascal Andriantsoavina, eveka mpanampy ao amin’ny diosezin’Antananarivo. Nasongadiny tamin’ny fifampizarana nentiny tamin’ny toriteniny ny toe-po enti-mivavaka sy fanarahana ny sitrapon’Andriamanitra izay tsy mankasitraka ny fisaratsarahana, ary indrindra ny fanarahana an’i Kristy fa tsy fanarahana olona izay mety manana ny kilemany ka mahatonga anao tsy hivavaka. « Aza manaraka olona fa Kristy no arahina », hoy ny eveka. Nanentana tamin’ny hira tamin’izany ny chorale Antsan’ny Trinite Masina Manjakaray. Teny amin’ny FLM 67 ha kosa no nanaovan’ny FFKM fiaraha-mivavaka notarihin’ireo filoham-piangonana ao anivony, nalefa tamin’ny TVM sy RNM tamin’io alahady 24 mey io ihany. « Mandehana araka ny fanahy fa vokatry ny fanahy dia fitiavana » no nitondran’ny Pasitera Ammi Andriamahazosoa ny toriteniny izay nanasongadinany ny halehiben’ny fitiavana tsy misy tambiny ka itiavana na dia ny fahavalo aza. Nakany ohatra manokana ny tantaran’i Nelson Mandela izay namela ireo fotsy hoditra nanagadra azy kanefa nisaorany.

 

Maherin’ny 5,4 tapitrisa no tratry ny tsimokaretina ‘covid-19’ maneran-tany tamin’ny 26 mey raha maherin’ny 4,8 tapitrisa izany tamin’ny 18 mey, ary maherin’ny 340 000 ireo namoy ny ainy (maherin’ny 317 000 tamin’ny 18 mey). Ho an’i Madagasikara, araka ny tatitra nentin’ny Profesora Vololontiana Hanta Marie Danielle, mpitondra teny ofisialy momba ny ‘covid-19’ tamin’ny 27 mey dia 612 ireo tranga mitondra ny tsimokaretina hatramin’ny 19 marsa nanaovana fitiliana (322 tamin’ny 18 mey), miisa 9681 ny fitiliana natao hatramin’ny 25 mey nanomezana ny tarehimarika tamin’ny 27 mey. Marihina fa vokatry ny fitiliana natao ny omalin’ny amoahana ny tarehimarika no aroson’ny mpitondra teny ofisialy momba ny covid-19 (8 ora maraina hatramin’ny 6 ora hariva). Miisa 151 no sitrana hatramin’ny tamin’ny 27 mey (119 tamin’ny 17 mey) ary 459 no manaraka fitsaboana (203 tamin’ny 17 mey). Mijanona ho roa ny namoy ny ainy noho ny covid-19 raha ny nambara tamin’ny 26 mey. Marihana fa lasa telo ireo toerana hanaovana fitiliana PCR dia ny HJRA, ny Centre d’infectiologie Charles Merieux ary ny Institut Pasteur de Madagascar.

Rasoanjanahary

Partager l'article:

Lakroa en direct
  • 31 Aug. 2021 - 09:26-

    Fahatezeran’ny filoham-pirenena Andry Rajoelina teo Ivato. Tafaverina ny alatsinainy 30 aogositra teo ny filoha Rajoelina rehefa namita iraka ekonomika sy diplomatika tany Frantsa. Niara-dia tamin’ny mpilalao Barea sasay ny tenany. Nanao vaan-dresaka fohy tamin’ny mpanao gazety ny tenany teo ampahatongavana teo Ivato. Naneho ny hatezerany tamin’ny mpikambana ny FMF ny tenany (Federasiona Malagasy Football) izay nambarany fa nisakana ny fahafahan’ny mpijery manatrika ny alalan’ny Barea ny 2 spetambra. Hahita izay nanao sonia iny taratasy iy hoy izy.

  • 31 Aug. 2021 - 09:26-

    Fitokanana ny Kianja Barea Mahamasina. Nambaran’ny filoha nandritra ny tafa fohy ntaony  ho an’ny mpanao gazety teny Ivato fa ho tanterahina ny 4 septambra izao ny fitokanana ny Kianja Barea izay nokasaina natao ny 2 septambra. Ity kianja monisipaly ity dia nohavaozina nanomboka tamin’ny fiandohan’ny taona 2020, mitentina 77 tapitrisa dolara avy amin’ny volam-panjakana madiodio, araka ny nambara tamin’izany fotoana.

  • 31 Aug. 2021 - 09:25-

    Famindram-pitantanana teo amin’ny Praiminisitra sy ny minisitry ny harena ankibonan’ny tany teo aloha. Notontosaina tamin’ny 23 aogositra 2021 ny famindram-pitantanana teo amin’ny Praiminisitra Ntsay Christian sy ny minisitry ny harena an-kibon’ny tany teo aloha Ravokatra Fidiniavo. Ny Praiminisitra izany no mitantana ity minisitera ity taorian’ny fametram-pialan’ny minisitra Brice Randrianasolo telo andro taorian’ny nanendrena azy tamin’ny 15 aogositra 2021.

  • 31 Aug. 2021 - 09:25-

    Fahazoan’ny mpitsara bakalorea any Antsiranana vola tamin’ny faritra sy kaominina. Nanolotra vola ho an’ireo mpitsara fanadinana bakalorea izay nanao fitokonana ny governoran’ny Faritra Diana sy ny ben’ny tanànan’ny kaominina ambonivohitra Antsiranana tamin’ny 23 aogositra 2021. Mitentina 34 tapitrisa Ariary ny avy avy amin’ny governora ary 16 tapitrisa Ariary ny avy amin'ny ben’ny tanàna. Nilaza ny tsy hitsara manko ireo mpitsara raha tsy voaloa ny tambim-pitsaran’izy ireo teo aloha. Ny minisiteran’ny fampianarana ambony sy ny fikarohana siantifika anefa dia efa nilaza, araka ny fampahafantarana nataony tamin’ny 17 aogositra fa efa nalefa any amin’ny oniversite isanisany ny vola tambin-karaman’ireo mpitsara ny fanadinana bakalorea 2020.

  • 31 Aug. 2021 - 09:25-

    Fivoaran’ny ‘covid-19’ sy ny hamehana ara-pahasalamana. Tsikaritra ho vitsy ny tranga vaovao amin’ny ‘covid-19’ raha mitaha amin’ny fitiliana atao tamin’iny herinandro iny, fa misy ihany ny tranga ahitam-pahasarotana. 3/351, 5/578, 3/845 ohatra ny tranga vaovao tamin’ny fitiliana natao tamin’ny 26, 27, ary 28 aogositra. Ny 23 marsa 2020 ka hatramin’ny 27 aogositra 2021, miisa 241 052 no fitambaran’ny fitiliana natao, miisa 955 ireo lavo, miisa 42 862 ireo tranga ka ny 42 566 no sitrana araka ny antotanisa ofisialy avy amin’ny minisiteran’ny fahasalamam-bahoaka. Mbola ao anatin’ny hamehana ara-pahasalamana i Madagasikara raha ny didim-panjakana navoaka tamin’ny 22 aogositra 2021, ary mipetraka ireo fepetra sakana samihafa.

  • 31 Aug. 2021 - 09:24-

    Filaharana haka tapakila hidirana ao Mahamasina. Ho tokanana amin’ny 2 septambra, andro hanatanterahana ny lalao hifanandrinan’i Barea Madagasikara sy ny ekipan’i Bénin amin’ny fifanintsanana hiadiana ny amboara eran-tany 2022 ny kianja Barea ao Mahamasina, araka ny fandaminana avy amin’ny prezidansa nampitaina tamin’ny fiandohan’ny herinandro lasa teo. Filaharana lava hatramin’ny vao maraina no hita ny alakamisy 26 sy zoma 27 aogositra mba haka ny tapakila hidirana ao Mahamasina, hijery baolina sady hanatrika ny fitokanana ny kianja.

  • 31 Aug. 2021 - 09:24-

    Fandavan’ny CAF ny hanatrehan’ny mpijery ny lalao ao Mahamasina. Nolavin’ny CAF (Confédération africaine de football) ny fangatahan’ny sekretera jeneralin’ny FMF (Fédération malagasy de football) ny hahafahan’ny mpijery miisa 1500 hanatrika ny lalao baolina kitra hatao ao Mahamasina amin’ny alakamisy 2 septambra 2021, ao anatin’ny fifanintsanana hiadiana ny amboara eran-tany 2022 hatao any Qatar. Araka ny fampatsiahivan’ny CAF ao amin’ny valim-pangatahan’ny FMF tamin’ny 27 aogositra, dia araka ny lamina napetraky ny CAF sy ny FIFA ny tsy hanatrehan’ny mpijery ny lalao noho ny valanaretina ‘covid-19’.

  • 31 Aug. 2021 - 09:23-

    Hetsiky ny RMDM Frantsa sy fisamborana/ famotsorana an’i Fanirisoa Ernaivo. Nandritra ny dian’ny filoham-pirenena malagasy tany Paris no nisian’ny hetsiky ny rodoben’ny mpanohitra RMDM Frantsa tarihin’i Fanirisoa Ernaivo izay mitsikera hatrany ny fitantanan’ny filoha Rajoelina sy mitaky ny fialany. Nandritra ny fihaonana tamin’ny Medef ny 25 aogositra, dia nisy ny fisamboran’ny polisy frantsay ity mpitarika ny RMDM Frantsa ity noho ny vaovao nampitaina tamin’izy ireo fa hoe mitondra fitaovam-piadiana izy saingy navotsotra ihany satria tsy nahitana izany tany aminy. Nambara ihany koa ny fisian’ny ‘mandat d’arrêt international’ hisambotra azy saingy tsy azo notanterahina izany raha ny nambaran’ny nokasaina hosamborina satria mpialokaloka politika no maha any azy. Voalaza fa ‘mandat d’arrêt’ nosoniavin’ny minisitry ny raharaham-bahiny Patrick Rajoelina tamin’ny 16 aogositra izany. Ny minisitry ny fitsarana ankehitriny Imbiky Herilaza dia nanamafy fa didim-pitsarana efa nivoaka ny fisamborana azy, nilaza izy fa hifampiraharaha amin’ny fanjakana frantsay ny fanjakana malagasy ny hisamborana sy hampodiana an’i Fanirisoa Ernaivo aty Madagasikara.

  • 31 Aug. 2021 - 09:23-

    Vidin-javatra midangana sy ny minisitera. Nametraka ny tokony ho saran’ny entana sasantsasany ilaina andavanandro ato anatin’ny enim-bolana ny minisitry ny indostria sy ny varotra ary ny fanjifana Edgard Razafindravahy. Tamin’ny 26 aogositra teo no nitondrany ny fanazavana momba izany. Anisan’izany ny menaka fihinana « huile de palme » izay tsy tokony hihoatra ny 6000 Ariary ny litatra, ny menaka soja ‘en vrac’ tsy tokony hihoatra ny 7000 Ariary ary ny anaty tavoahangy mihidy tsy hihoatra ny 7500 Ariary, ny vary tsy tokony hihoatra ny 2300 Ariary ny kilao, ny siramamy tsy tokony hihoatra ny 2600 Ariary ny kilao, torak’izany koa ny lafarinina tsy tokony hihoatra ny 2600 Ariary ny kilao, ny arina fandrehitra tsy tokony hihoatra ny 23 000 Ariary ny gony. Mbola lavitry ny vidiny teo aloha izay efa tsy zakan’ny ankamaroan’ny olona ireo raha ny fanehoan-kevitry ny olona satria tany amin’ny 5000 Ariary ny litatry ny menaka taon-dasa. Ny filoha malagasy moa dia nanome andro telo hamahana ny olan’ity fidangan’ny vidin’entana ilaina andavanandro ity tamin’ny kabariny saingy tsy tafa izany raha ny zava-misy.

  • 31 Aug. 2021 - 09:23-

    Praiminisitra nanao vakisiny. Nanao vaksiny fanefitry ny ‘covid-19’ ny praiminisitra Ntsay Christian tamin’ny alakamisy 26 aogositra teo. Tao amin’ny hopitaly Befelatanana no nanaovana vaksiny azy tamin’ilay atao hoe ‘Johnson & Johnson’, tsindrona indray mandeha. Nilaza ho fitaratra ho an’ny vahoaka ny praiminisitra tamin’ny nanaovana izany vaksiny izany.

  • 31 Aug. 2021 - 09:22-

    Filoham-pirenena malagasy sy ny Medef ary ny fihaonana tamin’ny filoha frantsay. Nanomboka tamin’ny talata 24 aogositra 2021 tany Paris ny fihaonan’ny vondron’ny mpandraharaha frankofonina ao amin’ny Medef nandraisan’ny delegasiona malagasy anjara notarihan’ny filoham-pirenena malagasy Andry Rajoelina. Taorian’izany fihaonana izany ihany koa no nisian’ny fihaonan’ny delegasiona notarihin’ny filoha tamin’ireo malagasy sasany any ivelany, maherin’ny 1000 tao amin’ny ambasady malagasy. Nisoratra anarana mialoha ireo nanatrika izany. Tombanana ho eo amin’ny 140 000 eo ho eo ireo malagasy any Frantsa raha ny antotanisa fantatra. Ny 27 aogositra dia nihaona manokana tamin’ny filoha frantsay Emmanuel Macron ny filoha malagasy, fa nialoha izany nisy ny kabary fohy nifandimbiasan’izy ireo, niresahana ny fiaraha-miasan’ny roa tonta. Miely amin’ny fampitam-baovao samihafa sy tambajotra sosialy ny fizotran’ireny fihaonana ireny.

  • 23 Aug. 2021 - 10:48-

    Fanamasinana diakra sy pretra redantorista. (Fiainam-pinoana katolika). Mitohy hatrany ny fanamasinana pretra sy diakra manerana ny diosezy samihafa eto amin’ny Nosy, eo anivon’ny Fiangonana katolika. Taratry ny fahaveloman’ny finoana sy firoborobon’ny fiantsoan’Andriamanitra izany. Anisan’ny tamin’ny faran’ny herinandro teo ny tao amin’ny diosezin’Antananarivo, tao Andempona Alasora ny alahady 22 aogositra, notarihan’ny arseveka Odon Razanakolona sy Mgr Rosario Saro. Nanaovana fanamasinana diakra sy pretra redantorista miisa 16 mirahalahy. Mahatratra 30 ny fanamasinana manerana ny diosezy eto amintsika raha ny nambaran’ny arseveka. Misy ny efa vita tamin’iny volana jolay iny toy ny an’ny lasalety tany Antsirabe, ny an’ny zezoita tao Antananarivo, fa mbola ho avy koa ny an’ny hafa.

  • 23 Aug. 2021 - 10:47-

    Filoha mitantana ny FJKM. Voafidy indray ho filohan'ny birao foibe FJKM ny mpitandrina Dr Irako Andriamahazosoa Ammi. Efa-taona no haharetan’ny maha filoha azy. Nandritra ny sinoda lehibe faha-19 natao tao Sambava (11-18 aogositra 2021) no nanatanterahana ny fifidianana ny filoha sy ny mpikambana mandrafitra ny birao foibe.

  • 23 Aug. 2021 - 10:46-

    Olan’ny tambin-karaman’ny mpitsara bakalorea any Antsiranana. Mikatso ny fitsarana ny taratasim-panadinana bakalorea any Antsiranana noho ny fitokonan’ireo mpampianatra mpitsara hatramin’ny nahavitan’ny fanadinana bakalorea tamin’ny 18 aogositra. Mitaky ny handoavana ny tambim-pitsarana tamin’ny 2020 izy ireo vao hiroso amin'izany. Tsy nisy akony ny fitakiana hatramin’ny 20 aogositra teo. Manoloana izany, mametra-panontaniana ny ray amamn-dreny ny alehan’ireny saram-pisoratana anarana ireny. Olana iraisan'ny mpitsara bakalorea  maneran'ny  Nosy izy io.

  • 23 Aug. 2021 - 10:45-

    Fandoavana ny volan’ny mpandraharaha mpanao lalana. Nanipy teny tamin’ny minisitry ny asa vaventy Hatrefindrazana Jerry ny minisitra Hajo Andrianainarivelo mba handreseny lahatra ny filoham-pirenena hanao sonia ny taratasy hahafahana mamoaka ny volan’ireo mpandraharaha amin’ny asa vaventy mbola tsy voaloa. Tamin’ny famindram-pahefana teo amin’izy mirahalahy no nitenenany izany. Efa ho herintaona ireo mpandraharaha ireo no tsy nahazo ny volany na dia efa vita aza ny asa, fa miandry ny tombana ataon’ny mpanara-maso ny tetikasam-panjakana. Nomem-pahefana handray anjara amin’ny fanaraha-maso ny tetikasam-panjakana ny goverinora, araka ny didim-panjakana noraisina tamin’ny filan-kevitry ny minisitra ny 18 aogositra 2021. Olom-boatendry hatramin’izao ny governora izay nasolo ny lehiben’ny faritra tokony ho olom-boafidy, araka ny lalàm-panorenana.

  • 23 Aug. 2021 - 10:44-

    Fanesorana ny tale jeneralin’ny tahirim-bolam-panjakana. Maro ny fanesorana sy fanendrena tompon’andraikitra ambony taorian’ny fiovan’ny mpikambana anivon’ny governemanta tamin’ny alahady 15 aogositra 2021. Anisan’izany ny fanafoanana ny didim-panjakana laharana 2019-2217 tamin'ny 11 desambra 2019 izay nanendry ny tale jeneralin’ny Tahirim-bolam-panjakana (trésor public), Ranjalahy Ihajambolatiana. Noraisina tamin’ny filan-kevitry ny minisitra tamin’ny alarobia 18 aogositra 2021 io didim-panjakana io. Naato ihany koa ny fandoavam-bola ankoatra ny karama mandra-panendry ny tale jeneraly vaovao.

  • 23 Aug. 2021 - 10:43-

    Fanitarana ny fe-potoanan’ny hamehana ara-pahasalamana sy fepetra. Araka ny didim-panjakana 2021-848 tamin’ny 22 aogositra 2021, dia mitohy mandritra ny 15 andro ny hamehana ara-pahasalamana noho ny fiarovana ny fahasalamam-bahoaka sy fisian’ny toe-javatra goavana mampisahotaka ny fiainam-bahoaka. Nanao fampahafantarana momba izany ny ao amin’ny fiadidiana ny repoblika, araka ny hita tamin’ny tambajotra sosialy. Mitohy noho izany ny fanajana ny fepetra sakana mahazatra toy ny tsy famoriana olona amina efitra mihidy mihoatra ny 400 sy ny fitandremam-pahadiovana. Eo ihany koa ny fanaovana vaksiny izay efa niditra tamin’ny fanaovana ny andiany faharoa nanomboka tamin’ny 19 aogositra teo.

  • 22 Aug. 2021 - 10:42-

    Lasa any Frantsa ny filoha Andry Rajoelina. Ny sabotsy 21 aogositra 2021 no lasa any Frantsa ny delegasiona tarihin’ny Filoham-pirenena Andry Rajoelina, hihaona amin’ny mpandraharaha frantsay ao anivon’ny MEDEF (Mouvement des entreprises de France). Anisan’ny delegasiona miaraka amin’ny filoha ny minisitry ny raharaham-bahiny Patrick Rajoelina, ny minisitry ny angovo sy ny akoran’afo Andry Ramaroson, ny minisitry ny fizahantany Joël Randriamandrato ary ny minisitry ny asa tanana sy ny haitao Sophie Ratsiraka. Hihaona amin’ny filoha Macron izy ny 27 aogositra ary amin’ny Dispora ny 28 aogositra.

  • 21 Aug. 2021 - 10:40-

    Fidirana sy fivoahana eto Madagasikara. Tonga ny zomà 20 aogositra teny amin’ny seranam-piaramanidina Ivato ny andiany voalohany tamin’ireo malagasy tavela tany Frantsa, araka ny fandaharana nataon’ny fitondram-panjakana. Ny sidina an’ny Air Caraibes no mitatitra ireo nahazo fankatoavana hody aty Madagasikara. Miisa 1500 ireo nahazo fankatoavana hody.

  • 20 Aug. 2021 - 10:22-

    Minisitra nametra-pialana. Nametra-pialana tamin’ny alakamisy hariva 19 aogositra ny minisitry ny harena ankibon'ny tany, Brice Randrianasolo. Telo andro izany no naha minisitra azy. Ary ny minisitra teo aloha efa nofoanana tamin’ny didim-panjakana ny maha minisitra azy no nambara fa mitantana indray ny minisitera.

Du même auteur

societe
societe

Dans la même rubrique

newtech
newtech