logo
Lakroan'i Madagasikara
Hoy ny haino aman-jery

Governemanta vaovao no mahasarika ny saina sy maso

Rasoanjanahary il y a 1 moi

Tsongom-baovao nanamarika Tsongom-baovao nanamarika ny herinandro faharoa amin’ny volana aogositra : Fahataperan’ny fe-potoam-piasan’ireo minisitra, Fanendrena ireo mpikambana mandrafitra ny governemanta vaovao, Vidin-javatra sy kabarin’ny filoham-pirenena, Rodoben’ny mpanohitra feno roa taona, Fitsaboana nenti-paharazana sy dokam-barotra, Fanafody nanjavona tao amin’ny seranan-tsambon’i Toamasina, Fametrahana ny faritra faha 23, Fanomezana mari-pankasitrahana manamboninahitra zandary, Fanavaozana ny lalànan’ny fananan-tany, « Fonds souverain » nankatoavin’ny depiote vitsivitsy, Vakisiny fanefitry ny « covid-19 » sy fivoaran’ny antotanisa, Fahatapahan’ny herinaratra.

Governemanta vaovao no mahasarika ny saina sy maso


 

Fahataperan’ny fe-potoam-piasan’ireo minisitra

Tapitra tamin’ny alarobia 11 aogositra 2021 ny fe-potoam-piasan’ireo minisitra rehetra ao amin’ny governemanta, araka ny fanapahan-kevitry ny filoham-pirenena Andry Rajoelina sy ny praiminisitra Ntsay Christian. Ka ny fampandehanan-draharaha andavanandro na « expédition des affaires courantes » no ataon’izy ireo mandra-panendry ireo minisitra handrafitra ny governemanta.

Fanendrena ireo mpikambana mandrafitra ny governemanta vaovao

Ny alahady hariva 15 aogositra 2021 no nanambarana tamim-pomba ofisialy teny amin’ny lapam-panjakana Iavoloha ireo mpikambana mandrafitra ny governemanta vaovao, araka ny didim-panjakana laharana 2021-822. Nalefa mivantana tamin’ny haino aman-jerim-panjakana TVM sy RNM ary ny tsy miankina. Ahitana mpikambana miisa 32 ka ny 22 no vaovao, 9 no efa teo ary iray novan-toerana. Anisan’ny mampiavaka azy ity ny fisiana minisitra lefitra 3 sy sekreteram-panjakana 2 ary mpikambana vazaha frantsay iray, mitantana ny Minisiteran’ny Raharaham-bahiny. Nitombo isa ihany koa raha nisy fotoana nampihenana izany mba ho fitsitsiana. Nambaran’ny filoham-pirenena fa fanatanterahana « Contrat-programme » sy « obligation de résultats » no fepetra arahin’ireo mpikambana ary manao sonia izany izy ireo. Taorian’io fotoana io dia nitarika filan-kevitry ny minisitra ny filoham-pirenena, ary lasa any Malawi avy eo, hanatrika ny fivorian’ny filoham-panjakana sy mpitondra anivon’ny Sadc (16-17 aogositra).


Vidin-javatra sy kabarin’ny filoham-pirenena

Andro telo taorian’ny nilazan’ny filoham-pirenena, Andry Rajoelina, fa tsy maintsy vahana ao anatin’ny telo andro ny vidin-javatra midangana, dia tsy nahitam-piovana izany amin’ny ankapobeny raha ny tao an-drenivohitra, ary hatramin’ny faran’ny herinandro aza. Ny alahady 8 aogositra 2021 izy no nilaza fa hanome baiko ny tompon’andraikitra isan-tsokajiny hifehezana ny vidin’entina araka ny tokony ho izy.


Rodoben’ny mpanohitra feno roa taona

Nanamarika ny taona faharoa niorenany tamin’ny talata 10 aogositra 2021 ny RMDM na ny Rodoben’ny mpanohitra ho an’ny demokrasia eto Madagasikara. Tao amin’ny kianjan’ny Magro Behoririka no nanamarihana izany. Nahitana ireo mpikambana isan-tokony toy ny avy amin’ny antoko Tim tarihin’ny filoha teo aloha, Ravalomanana Marc.


Fitsaboana nenti-paharazana sy dokam-barotra

Manoloana ny firoboroboan’ny dokam-barotra amin’ny fitsaboana nenti-paharazana sy fanafody, dia nanao fampatsiahivana ny minisitry ny Fahasalamam-bahoaka, ny Profesora Rakotovao Hanitrala Jean Louis, fa misy lalàna ny fomba fitsaboana eto Madagasikara. Fampahatsiahivana nataony tamin’ny 10 aogositra teo. Mihoa-pefy, hoy izy, ny fanaovana dokam-barotra amin’ny sehatry ny fahasalamana ka nanaovany antso ny mba hanajana ny ara-dalàna.


Fanafody nanjavona tao amin’ny seranan-tsambon’i Toamasina

Araka ny fampandrenesana tamin’ny haino aman-jery sy tambajotra sosialy tamin’iny herinandro iny, nataon’ny orinasa mpamongady fanadody OPHAM (Office Pharmaceutique Malgache), dia nisy nangalatra sy nanjavona tao amin’ny seranan-tsambon’i Toamasina, ny 5 aogositra lasa teo, ny kaontenera iray nisy fanafody 1360 baoritra, mitondra ny marika DESKA. Ahitana amoxicilline gélules, ampicilline injectable, ibuprofen comprimés, ary peniciline G injectable.


Fametrahana ny faritra faha-23

Notontosaina tamin’ny 11 aogositra 2021 ny sonia nataon'ny filohan'ny Repoblika Andry Rajoelina ny lalàna mametraka amin'ny fomba ofisialy ny Faritra Vatovavy ho faritra faha 23 eto Madagasikara. Ny Faritra Vatovavy izany dia ahitana ny distrikan'i Mananjary, ny distrikan'i Nosy Varika ary ny distrikan'Ifanadiana. Ny distrikan'i Manakara, Vohipeno ary Ikongo kosa no mandrafitra ny Faritra Fitovinany. Teny amin’ny lapam-panjakana Iavoloha no nanaovana ny lanonana momba izany, ary nampiakarana ireo solontenan’ny Ampanjaka sy Olobe avy ao amin'ny Faritra Vatovavy sy Fitovinany.


Fanomezana mari-pankasitrahana manamboninahitra zandary

Nasondrotry ny Filohan'ny Repoblika Andry Rajoelina sady filoha faratampon'ny Foloalindahy ho amin'ny laharam-boninahitra "Grand croix de deuxième classe de l'Ordre national malagasy", ny Jeneraly Richard Ravalomanana. Izy moa dia sekreteram-panjakana eo anivon'ny Ministeran'ny fiarovam-pirenena miadidy ny Zandarimariam-pirenena, niasa 40 taona sy efa-bolana teo anivon'ny Zandarimariam-pirenena. Teny Ivato no nanaovana ny lanonana nanatanterahana izany tamin’ny 12 aogositra 2021. Ankoatra ny an’ity jeneraly ity, dia teo ihany koa ny fanomezana medaly sy fampiakarana laharam-boninahitra manokana ho an’ireo manamboninahitra sy manamboninahitra lefitra eo anivon’ny zandarimariam-pirenena.


Fanavaozana ny lalànan’ny fananan-tany

Manaitra ny fitondram-panjakana ny « Collectif tany », vondrona miaro ny tany malagasy, momba ny fanavaozana ny lalàna 2006-31 momba ny fananan-tany an’olon-tsotra tsy vita titra sy ny fampiatoana ny fanomezana karatany. Voalazan’ny antso fanairana nataony tamin’ny 10 aogositra fa misy fihemorana amin’ny fizakan-tany izany fanavaozana ny lalàna izany ary fanamorana ny hahazoan’ny vahiny tany eto Madagasikara. Tondroiny manokana amin’ny fanairana ataony ny filohan’ny Repoblika sy ny Fitsarana Avo momba ny Lalàm-panorenena mba tsy hanao sonia sy handany izany lalàna izany. Tsiahivin’ny « Collectif tany » fa depiote 9 amin’ny 18 no nandany ilay lalàna 2021-016 ny alin’ny 30 jona 2021 tamin’ny 10 ora sy sasany, miisa 151 anefa ireo depiote.


« Fonds souverain » nankatoavin’ny depiote vitsivitsy

Nankatoavin’ireo depiote nivory tamin’ny alalan’ny « visioconférence » tamin’ny 13 aogositra 2021 ny lalàna fametrahana ny atao hoe « fonds souverain ». Tahiry manokana an’ny fanjakana malagasy hiatrehana ny fampandrosoana ny firenena tsy miankin-doha amin’ny famatsiambola ivelany. Depiote miisa 26 no tonga tamin’ny fandaniana izany lalàna izany ary 23 amin’izy ireo no nankato azy, 3 no nitsipaka ka anisan’izany ny depiote Roland Ratsiraka. Nambaran’ity nitsipaka fa mety ho fanadiovam-bola ny fametrahana io tahiry io.


Vakisiny fanefitry ny « Covid-19 » sy fivoaran’ny antotanisa

Tonga tamin’ny 15 aogositra 2021 teny amin’ny seranan’Ivato ny vakisiny « astrazeneca » miisa 200 000 avy amin’ny firenena Frantsay ho an'i Madagasikara, ao anatin’ny programa « Covax ». Ny Unicef no miantsoroka ny fanaterana ny vakisiny eto amintsika. Ireo izany no fatra faharoa taorian’ilay voalohany natao vakisiny tamin’ny « Covishield ». Mitovy ny kasinga anatin’ny Astrazeneca sy ny Covishield, araka ny fanamarihana avy amin’ny Minisiteran’ny Fahasalamana. Aorian’ny fanatanterahana ny tsindrona faharoa amin’ny Astrazeneca, ho an’izay nanao tamin’ny voalohany, dia aorian’izany ny fanaovana ny vakisiny « Johnson and Johnson » ho an’izay hanao izany. Eo amin’ny fivoaran’ny antotanisa ofisialy momba ny « Covid-19 » eto amintsika dia toy izao izany ny 23 marsa 2020 hatramin’ny 13 aogositra 2021 : miisa 42 811 ny fitambaran’ny tranga ka ny 42 505 no sitrana, miisa 952 ny fitambaran’ny lavo, ary 233 113 no fitambaran’ny fitiliana natao. Tsikaritra ho mihena hatrany ny tranga amin’ny fitiliana atao, miisa 9 izany amin’ny fitiliana 306 natao tamin’ny 13 aogositra, 4 no sitrana ary 1 no lavo.


Fahatapahan’ny herinaratra

Tsikaritry ny mpanjifa tao ho ao fa misy fahatapatapahana matetika ny herinaratra, toy ny tamin’ny alahady 15 aogositra, tamin’ny faritra sasany tao Antananarivo. Tsy voafaritra ao anatin’ilay fampiomanana mahazatra ambara amin’ny fampitam-baovao samihafa. Mbola tsy voavaha io olan’ny herinaratra io hatreto, amin’ny faritra maro manerana ny Nosy.

Partager l'article:

Lakroa en direct
  • 31 Aug. 2021 - 09:26-

    Fahatezeran’ny filoham-pirenena Andry Rajoelina teo Ivato. Tafaverina ny alatsinainy 30 aogositra teo ny filoha Rajoelina rehefa namita iraka ekonomika sy diplomatika tany Frantsa. Niara-dia tamin’ny mpilalao Barea sasay ny tenany. Nanao vaan-dresaka fohy tamin’ny mpanao gazety ny tenany teo ampahatongavana teo Ivato. Naneho ny hatezerany tamin’ny mpikambana ny FMF ny tenany (Federasiona Malagasy Football) izay nambarany fa nisakana ny fahafahan’ny mpijery manatrika ny alalan’ny Barea ny 2 spetambra. Hahita izay nanao sonia iny taratasy iy hoy izy.

  • 31 Aug. 2021 - 09:26-

    Fitokanana ny Kianja Barea Mahamasina. Nambaran’ny filoha nandritra ny tafa fohy ntaony  ho an’ny mpanao gazety teny Ivato fa ho tanterahina ny 4 septambra izao ny fitokanana ny Kianja Barea izay nokasaina natao ny 2 septambra. Ity kianja monisipaly ity dia nohavaozina nanomboka tamin’ny fiandohan’ny taona 2020, mitentina 77 tapitrisa dolara avy amin’ny volam-panjakana madiodio, araka ny nambara tamin’izany fotoana.

  • 31 Aug. 2021 - 09:25-

    Famindram-pitantanana teo amin’ny Praiminisitra sy ny minisitry ny harena ankibonan’ny tany teo aloha. Notontosaina tamin’ny 23 aogositra 2021 ny famindram-pitantanana teo amin’ny Praiminisitra Ntsay Christian sy ny minisitry ny harena an-kibon’ny tany teo aloha Ravokatra Fidiniavo. Ny Praiminisitra izany no mitantana ity minisitera ity taorian’ny fametram-pialan’ny minisitra Brice Randrianasolo telo andro taorian’ny nanendrena azy tamin’ny 15 aogositra 2021.

  • 31 Aug. 2021 - 09:25-

    Fahazoan’ny mpitsara bakalorea any Antsiranana vola tamin’ny faritra sy kaominina. Nanolotra vola ho an’ireo mpitsara fanadinana bakalorea izay nanao fitokonana ny governoran’ny Faritra Diana sy ny ben’ny tanànan’ny kaominina ambonivohitra Antsiranana tamin’ny 23 aogositra 2021. Mitentina 34 tapitrisa Ariary ny avy avy amin’ny governora ary 16 tapitrisa Ariary ny avy amin'ny ben’ny tanàna. Nilaza ny tsy hitsara manko ireo mpitsara raha tsy voaloa ny tambim-pitsaran’izy ireo teo aloha. Ny minisiteran’ny fampianarana ambony sy ny fikarohana siantifika anefa dia efa nilaza, araka ny fampahafantarana nataony tamin’ny 17 aogositra fa efa nalefa any amin’ny oniversite isanisany ny vola tambin-karaman’ireo mpitsara ny fanadinana bakalorea 2020.

  • 31 Aug. 2021 - 09:25-

    Fivoaran’ny ‘covid-19’ sy ny hamehana ara-pahasalamana. Tsikaritra ho vitsy ny tranga vaovao amin’ny ‘covid-19’ raha mitaha amin’ny fitiliana atao tamin’iny herinandro iny, fa misy ihany ny tranga ahitam-pahasarotana. 3/351, 5/578, 3/845 ohatra ny tranga vaovao tamin’ny fitiliana natao tamin’ny 26, 27, ary 28 aogositra. Ny 23 marsa 2020 ka hatramin’ny 27 aogositra 2021, miisa 241 052 no fitambaran’ny fitiliana natao, miisa 955 ireo lavo, miisa 42 862 ireo tranga ka ny 42 566 no sitrana araka ny antotanisa ofisialy avy amin’ny minisiteran’ny fahasalamam-bahoaka. Mbola ao anatin’ny hamehana ara-pahasalamana i Madagasikara raha ny didim-panjakana navoaka tamin’ny 22 aogositra 2021, ary mipetraka ireo fepetra sakana samihafa.

  • 31 Aug. 2021 - 09:24-

    Filaharana haka tapakila hidirana ao Mahamasina. Ho tokanana amin’ny 2 septambra, andro hanatanterahana ny lalao hifanandrinan’i Barea Madagasikara sy ny ekipan’i Bénin amin’ny fifanintsanana hiadiana ny amboara eran-tany 2022 ny kianja Barea ao Mahamasina, araka ny fandaminana avy amin’ny prezidansa nampitaina tamin’ny fiandohan’ny herinandro lasa teo. Filaharana lava hatramin’ny vao maraina no hita ny alakamisy 26 sy zoma 27 aogositra mba haka ny tapakila hidirana ao Mahamasina, hijery baolina sady hanatrika ny fitokanana ny kianja.

  • 31 Aug. 2021 - 09:24-

    Fandavan’ny CAF ny hanatrehan’ny mpijery ny lalao ao Mahamasina. Nolavin’ny CAF (Confédération africaine de football) ny fangatahan’ny sekretera jeneralin’ny FMF (Fédération malagasy de football) ny hahafahan’ny mpijery miisa 1500 hanatrika ny lalao baolina kitra hatao ao Mahamasina amin’ny alakamisy 2 septambra 2021, ao anatin’ny fifanintsanana hiadiana ny amboara eran-tany 2022 hatao any Qatar. Araka ny fampatsiahivan’ny CAF ao amin’ny valim-pangatahan’ny FMF tamin’ny 27 aogositra, dia araka ny lamina napetraky ny CAF sy ny FIFA ny tsy hanatrehan’ny mpijery ny lalao noho ny valanaretina ‘covid-19’.

  • 31 Aug. 2021 - 09:23-

    Hetsiky ny RMDM Frantsa sy fisamborana/ famotsorana an’i Fanirisoa Ernaivo. Nandritra ny dian’ny filoham-pirenena malagasy tany Paris no nisian’ny hetsiky ny rodoben’ny mpanohitra RMDM Frantsa tarihin’i Fanirisoa Ernaivo izay mitsikera hatrany ny fitantanan’ny filoha Rajoelina sy mitaky ny fialany. Nandritra ny fihaonana tamin’ny Medef ny 25 aogositra, dia nisy ny fisamboran’ny polisy frantsay ity mpitarika ny RMDM Frantsa ity noho ny vaovao nampitaina tamin’izy ireo fa hoe mitondra fitaovam-piadiana izy saingy navotsotra ihany satria tsy nahitana izany tany aminy. Nambara ihany koa ny fisian’ny ‘mandat d’arrêt international’ hisambotra azy saingy tsy azo notanterahina izany raha ny nambaran’ny nokasaina hosamborina satria mpialokaloka politika no maha any azy. Voalaza fa ‘mandat d’arrêt’ nosoniavin’ny minisitry ny raharaham-bahiny Patrick Rajoelina tamin’ny 16 aogositra izany. Ny minisitry ny fitsarana ankehitriny Imbiky Herilaza dia nanamafy fa didim-pitsarana efa nivoaka ny fisamborana azy, nilaza izy fa hifampiraharaha amin’ny fanjakana frantsay ny fanjakana malagasy ny hisamborana sy hampodiana an’i Fanirisoa Ernaivo aty Madagasikara.

  • 31 Aug. 2021 - 09:23-

    Vidin-javatra midangana sy ny minisitera. Nametraka ny tokony ho saran’ny entana sasantsasany ilaina andavanandro ato anatin’ny enim-bolana ny minisitry ny indostria sy ny varotra ary ny fanjifana Edgard Razafindravahy. Tamin’ny 26 aogositra teo no nitondrany ny fanazavana momba izany. Anisan’izany ny menaka fihinana « huile de palme » izay tsy tokony hihoatra ny 6000 Ariary ny litatra, ny menaka soja ‘en vrac’ tsy tokony hihoatra ny 7000 Ariary ary ny anaty tavoahangy mihidy tsy hihoatra ny 7500 Ariary, ny vary tsy tokony hihoatra ny 2300 Ariary ny kilao, ny siramamy tsy tokony hihoatra ny 2600 Ariary ny kilao, torak’izany koa ny lafarinina tsy tokony hihoatra ny 2600 Ariary ny kilao, ny arina fandrehitra tsy tokony hihoatra ny 23 000 Ariary ny gony. Mbola lavitry ny vidiny teo aloha izay efa tsy zakan’ny ankamaroan’ny olona ireo raha ny fanehoan-kevitry ny olona satria tany amin’ny 5000 Ariary ny litatry ny menaka taon-dasa. Ny filoha malagasy moa dia nanome andro telo hamahana ny olan’ity fidangan’ny vidin’entana ilaina andavanandro ity tamin’ny kabariny saingy tsy tafa izany raha ny zava-misy.

  • 31 Aug. 2021 - 09:23-

    Praiminisitra nanao vakisiny. Nanao vaksiny fanefitry ny ‘covid-19’ ny praiminisitra Ntsay Christian tamin’ny alakamisy 26 aogositra teo. Tao amin’ny hopitaly Befelatanana no nanaovana vaksiny azy tamin’ilay atao hoe ‘Johnson & Johnson’, tsindrona indray mandeha. Nilaza ho fitaratra ho an’ny vahoaka ny praiminisitra tamin’ny nanaovana izany vaksiny izany.

  • 31 Aug. 2021 - 09:22-

    Filoham-pirenena malagasy sy ny Medef ary ny fihaonana tamin’ny filoha frantsay. Nanomboka tamin’ny talata 24 aogositra 2021 tany Paris ny fihaonan’ny vondron’ny mpandraharaha frankofonina ao amin’ny Medef nandraisan’ny delegasiona malagasy anjara notarihan’ny filoham-pirenena malagasy Andry Rajoelina. Taorian’izany fihaonana izany ihany koa no nisian’ny fihaonan’ny delegasiona notarihin’ny filoha tamin’ireo malagasy sasany any ivelany, maherin’ny 1000 tao amin’ny ambasady malagasy. Nisoratra anarana mialoha ireo nanatrika izany. Tombanana ho eo amin’ny 140 000 eo ho eo ireo malagasy any Frantsa raha ny antotanisa fantatra. Ny 27 aogositra dia nihaona manokana tamin’ny filoha frantsay Emmanuel Macron ny filoha malagasy, fa nialoha izany nisy ny kabary fohy nifandimbiasan’izy ireo, niresahana ny fiaraha-miasan’ny roa tonta. Miely amin’ny fampitam-baovao samihafa sy tambajotra sosialy ny fizotran’ireny fihaonana ireny.

  • 23 Aug. 2021 - 10:48-

    Fanamasinana diakra sy pretra redantorista. (Fiainam-pinoana katolika). Mitohy hatrany ny fanamasinana pretra sy diakra manerana ny diosezy samihafa eto amin’ny Nosy, eo anivon’ny Fiangonana katolika. Taratry ny fahaveloman’ny finoana sy firoborobon’ny fiantsoan’Andriamanitra izany. Anisan’ny tamin’ny faran’ny herinandro teo ny tao amin’ny diosezin’Antananarivo, tao Andempona Alasora ny alahady 22 aogositra, notarihan’ny arseveka Odon Razanakolona sy Mgr Rosario Saro. Nanaovana fanamasinana diakra sy pretra redantorista miisa 16 mirahalahy. Mahatratra 30 ny fanamasinana manerana ny diosezy eto amintsika raha ny nambaran’ny arseveka. Misy ny efa vita tamin’iny volana jolay iny toy ny an’ny lasalety tany Antsirabe, ny an’ny zezoita tao Antananarivo, fa mbola ho avy koa ny an’ny hafa.

  • 23 Aug. 2021 - 10:47-

    Filoha mitantana ny FJKM. Voafidy indray ho filohan'ny birao foibe FJKM ny mpitandrina Dr Irako Andriamahazosoa Ammi. Efa-taona no haharetan’ny maha filoha azy. Nandritra ny sinoda lehibe faha-19 natao tao Sambava (11-18 aogositra 2021) no nanatanterahana ny fifidianana ny filoha sy ny mpikambana mandrafitra ny birao foibe.

  • 23 Aug. 2021 - 10:46-

    Olan’ny tambin-karaman’ny mpitsara bakalorea any Antsiranana. Mikatso ny fitsarana ny taratasim-panadinana bakalorea any Antsiranana noho ny fitokonan’ireo mpampianatra mpitsara hatramin’ny nahavitan’ny fanadinana bakalorea tamin’ny 18 aogositra. Mitaky ny handoavana ny tambim-pitsarana tamin’ny 2020 izy ireo vao hiroso amin'izany. Tsy nisy akony ny fitakiana hatramin’ny 20 aogositra teo. Manoloana izany, mametra-panontaniana ny ray amamn-dreny ny alehan’ireny saram-pisoratana anarana ireny. Olana iraisan'ny mpitsara bakalorea  maneran'ny  Nosy izy io.

  • 23 Aug. 2021 - 10:45-

    Fandoavana ny volan’ny mpandraharaha mpanao lalana. Nanipy teny tamin’ny minisitry ny asa vaventy Hatrefindrazana Jerry ny minisitra Hajo Andrianainarivelo mba handreseny lahatra ny filoham-pirenena hanao sonia ny taratasy hahafahana mamoaka ny volan’ireo mpandraharaha amin’ny asa vaventy mbola tsy voaloa. Tamin’ny famindram-pahefana teo amin’izy mirahalahy no nitenenany izany. Efa ho herintaona ireo mpandraharaha ireo no tsy nahazo ny volany na dia efa vita aza ny asa, fa miandry ny tombana ataon’ny mpanara-maso ny tetikasam-panjakana. Nomem-pahefana handray anjara amin’ny fanaraha-maso ny tetikasam-panjakana ny goverinora, araka ny didim-panjakana noraisina tamin’ny filan-kevitry ny minisitra ny 18 aogositra 2021. Olom-boatendry hatramin’izao ny governora izay nasolo ny lehiben’ny faritra tokony ho olom-boafidy, araka ny lalàm-panorenana.

  • 23 Aug. 2021 - 10:44-

    Fanesorana ny tale jeneralin’ny tahirim-bolam-panjakana. Maro ny fanesorana sy fanendrena tompon’andraikitra ambony taorian’ny fiovan’ny mpikambana anivon’ny governemanta tamin’ny alahady 15 aogositra 2021. Anisan’izany ny fanafoanana ny didim-panjakana laharana 2019-2217 tamin'ny 11 desambra 2019 izay nanendry ny tale jeneralin’ny Tahirim-bolam-panjakana (trésor public), Ranjalahy Ihajambolatiana. Noraisina tamin’ny filan-kevitry ny minisitra tamin’ny alarobia 18 aogositra 2021 io didim-panjakana io. Naato ihany koa ny fandoavam-bola ankoatra ny karama mandra-panendry ny tale jeneraly vaovao.

  • 23 Aug. 2021 - 10:43-

    Fanitarana ny fe-potoanan’ny hamehana ara-pahasalamana sy fepetra. Araka ny didim-panjakana 2021-848 tamin’ny 22 aogositra 2021, dia mitohy mandritra ny 15 andro ny hamehana ara-pahasalamana noho ny fiarovana ny fahasalamam-bahoaka sy fisian’ny toe-javatra goavana mampisahotaka ny fiainam-bahoaka. Nanao fampahafantarana momba izany ny ao amin’ny fiadidiana ny repoblika, araka ny hita tamin’ny tambajotra sosialy. Mitohy noho izany ny fanajana ny fepetra sakana mahazatra toy ny tsy famoriana olona amina efitra mihidy mihoatra ny 400 sy ny fitandremam-pahadiovana. Eo ihany koa ny fanaovana vaksiny izay efa niditra tamin’ny fanaovana ny andiany faharoa nanomboka tamin’ny 19 aogositra teo.

  • 22 Aug. 2021 - 10:42-

    Lasa any Frantsa ny filoha Andry Rajoelina. Ny sabotsy 21 aogositra 2021 no lasa any Frantsa ny delegasiona tarihin’ny Filoham-pirenena Andry Rajoelina, hihaona amin’ny mpandraharaha frantsay ao anivon’ny MEDEF (Mouvement des entreprises de France). Anisan’ny delegasiona miaraka amin’ny filoha ny minisitry ny raharaham-bahiny Patrick Rajoelina, ny minisitry ny angovo sy ny akoran’afo Andry Ramaroson, ny minisitry ny fizahantany Joël Randriamandrato ary ny minisitry ny asa tanana sy ny haitao Sophie Ratsiraka. Hihaona amin’ny filoha Macron izy ny 27 aogositra ary amin’ny Dispora ny 28 aogositra.

  • 21 Aug. 2021 - 10:40-

    Fidirana sy fivoahana eto Madagasikara. Tonga ny zomà 20 aogositra teny amin’ny seranam-piaramanidina Ivato ny andiany voalohany tamin’ireo malagasy tavela tany Frantsa, araka ny fandaharana nataon’ny fitondram-panjakana. Ny sidina an’ny Air Caraibes no mitatitra ireo nahazo fankatoavana hody aty Madagasikara. Miisa 1500 ireo nahazo fankatoavana hody.

  • 20 Aug. 2021 - 10:22-

    Minisitra nametra-pialana. Nametra-pialana tamin’ny alakamisy hariva 19 aogositra ny minisitry ny harena ankibon'ny tany, Brice Randrianasolo. Telo andro izany no naha minisitra azy. Ary ny minisitra teo aloha efa nofoanana tamin’ny didim-panjakana ny maha minisitra azy no nambara fa mitantana indray ny minisitera.

Du même auteur

newtech
societe

Dans la même rubrique

newtech
newtech